Биыл ҰБТ сұрақтары 50%-ға өзгертілді

Ұлттық тестiлеу орталығының директоры Рамазан Әлiмқұлов биылғы жылы Ұлттық бiрыңғай тестiлеу қалай өтетiнiн айтып бердi, деп хабарлайды Baq.kz тiлшiсi.

«Биылғы жылы ҰБТ 15-шi рет өтедi. Осы уақыт iшiнде 1,5 миллионға жуық түлек Ұлттық бiрыңғай тестiлеуге қатысты. Қазiргi таңда тестiлеуге дайындық штаттық режимде өтiп жатыр, барлық аудиториялар дайын. Биыл ҰБТ форматының өзгермейтiнiн өздерiңiз бiлесiздер», - дедi Әлiмқұлов Үкiмет үйiнде өткен баспасөз мәжiлiсiнде.

Сондай-ақ, директордың айтуынша, апелляция механизмiнде де ешқандай өзгерiс болмайды. Рамазан Әлiмқұлов былтырғы жылы 198 апелляциялық өтiнiштiң түскенiн еске салды. Олардың тең жартысы техникалық мәселелерге қатысты болса, жартысы мазмұнына қатысты болған. Және де, Ұлттық тестiлеу орталығының директоры биыл сұрақтар базасы 50%-ға жаңартылғанын айтты. Осылайша, 2018 жылғы Ұлттық бiрыңғай тестiлеу сұрақтарының саны 80 мыңға жетпек.

Дереккөз: Baq.kz