ҰЛТТЫҚ УРБАН ФОРУМЫНЫҢ ҚАТЫСУШЫЛАРЫ ҚЫЗЫЛОРДАНЫ АРАЛАДЫ
Ұлттық Урбан форумы - қала мәселелеріне және урбанистикаға арналған ауқымды диалог алаңы. Биыл бұл форум Қызылорда қаласында өтеді. Бүгін форумға қатысушылар Қызылорданың бірқатар әлеуметтік, мәдени және спорттық нысандарын аралап шықты.
Сапар қайта жаңғыртудан өткен орталық алаңнан басталды. Мұнан соң форум қонақтары қалалық мәдениет және демалыс паркіндегі жаңғырту жұмыстарының нәтижесін көрді. Сондай-ақ Тәуелсіздік даңғылымен жүріп өтіп, Сырдария өзенінің жай-күйімен де танысты.
Бұдан кейін форум делегаттары 11 мың орындық жаңа стадионның құрылыс алаңына барса, кейін жуырда ғана пайдалануға берілген физика-математика бағытындағы мектеп-интернаттың заманауи инфрақұрылымын көрді.
Қатысушылар үстел теннисі орталығының жұмысын да назардан тыс қалдырмады. Бұдан бөлек, облыстық тарихи-өлкетану музейі мен “Сыр жұлдыздары” шығармашылық-инновациялық академиясының қызметімен танысты. Қорытынды нысан ретінде “Анаға тағзым” рухани-танымдық орталығына арнайы аялдап, орталықтың мақсаты мен мазмұны жайында ақпарат алды.
Ұлттық форум аясында ұйымдастырылған бұл танысу сапары өз кезегінде қалалардың даму тәжірибесін зерделеп, урбанистика саласындағы тиімді жобалармен бөлісуге мүмкіндік береді.
@Қызылорда облысының Өңірлік коммуникациялар қызметі
