БАСТЫ ОРЫНДА – БАЛА ДЕНСАУЛЫҒЫ
Елімізде 1 маусым – Халықаралық балаларды қорғау күні ретінде аталып өтіледі. Бала – мемлекетіміздің болашағы, ұрпақ жалғастығы. Ертеңгі күнімізден зор үміт күтетініміз де сол балалар.
Отбасында ата-ана перзентінің тәрбиелі, білімді болуын қадағаласа, дәрігер қауым әр баланың денсаулығы жақсы болса екен деп жай тілеп қоймай, сол бағытта көптеген жұмыс атқарады. Себебі саламатты қоғамды құратын да, денсаулығы жақсы, ұзақ өмір сүретін адамдар. Сол үшін де ақ халатты абзал жандар болашағымыз саналатын – балаларымыздың жолы ашық, бақытты өмір сүргенін қалаймыз. Бұл мереке – балақайларымыздың жарқын болашағына деген сенімнің айқын көрінісі десек болады.
Айтулы мереке қарсаңында аудандық ауруханада «Дәрігер – балалардың жанашыры» тақырыбында балаларды қорғау күніне арналған 22-31 мамыр аралығында апталық басталды. Онда балалар денсаулығына арналған Ашық есік күні өткізіліп, бейім мамандармен қаралу ұйымдастырылады. 26 мамырда балалар арасында Денсаулық күніне орай таңертеңгілік жаттығу жүргізіледі. Осы іс-шараларға ата-аналар мен балаларды қатысуға және белсенділік танытуға шақырамын.
Парида САРЫБАЕВА,
аудандық емхана бас дәрігерінің «Ана мен бала»
жөніндегі орынбасары
