+44 градусқа дейін аптап және бұршақ: Қазақстанда ауа райы күрт өзгереді
"Қазгидромет" синоптиктері 15, 16 және 17 мамырға арналған ауа райы болжамын жариялады, - деп хабарлайды Tengrinews.kz тілшісі.
Аптаның басында Иран аумағынан келетін жылы ауа массалары Қазақстанның басым бөлігінде жауын-шашынсыз, ыстық ауа райын сақтайды. Күндізгі уақытта термометр бағандары оңтүстік өңірлерде 35-44 градусқа дейін, солтүстік, орталық және шығыс аймақтарда 35-37 градусқа дейін ыстықты көрсетеді. Абай және Ұлытау облыстарының оңтүстігінде, сондай-ақ Қарағанды облысында 40 градусқа дейін қатты ыстық күтіледі.
Алайда 16 мамырда атмосфералық фронтальді бөліктердің әсерінен еліміздің батыс, солтүстік-батыс және солтүстік өңірлерінде жаңбыр жауып, найзағай ойнап, бұршақ жаууы мүмкін. Маңғыстау облысында жаңбыр болжанған.
Ел бойынша жел күшейіп, оңтүстікте құмды дауыл соғуы мүмкін."17 мамырда Қазақстанның басым бөлігінде найзағай соғып, жаңбыр, бұршақ, кей өңірлерде нөсер мен дауылды жел күтіледі. Осыған байланысты солтүстік аймақтарда күндізгі температура 18-28 градусқа дейін төмендейді. Алайда оңтүстік өңірлерде әлі де 43 градусқа дейін қатты ыстық сақталады", – дейді синоптиктер.
