Астана-Щучье тас жолында 40-қа жуық автокөлік соқтығысты

Фото: Әлеуметтік желіден алынды

Ақмола облысында «Астана-Щучинск» тас жолында жаппай жол апаты болды, онда шамамен 40 автокөлік соқтығысқан, деп хабарлайды Kazinform агенттігінің тілшісі.

Ақмола облысы полиция департаментінің баспасөз қызметі хабарлағандай, жол апаты 3 қаңтар күні сағат 13:30-да Біржан сал ауданының Қоғам және Қаратал ауылдарының арасында болған.

– Ауа райының нашарлауына байланысты (боран, көрінудің шектелуі) алдын ала мәлімет бойынша шамамен 40 көлік соқтығысқан. Әзірге қаза болғандар мен зардап шеккендер туралы ақпарат түскен жоқ. Оқиға орнында полиция және төтенше жағдайлар қызметінің мамандары жұмыс істеп жатыр. Көліктерді эвакуациялау және жол қозғалысы қауіпсіздігін қамтамасыз ету шаралары жүргізілуде, – деп хабарлады ведомство.

Бұған дейін төтенше қызметтер өңірде ауа райының нашарлауына байланысты барлық жүргізушілерге, әсіресе қала сыртындағы жолдарда, сапарлардан бас тартуды ұсынған болатын.

– Жүргізушілерді ауа райы жағдайларын ескеруге, жолда өте сақ болуға және жағдай жақсарғанша осы бағытта жүруден бас тартуға шақырамыз, – деп мәлімдеді полиция. 

Айта кетейік, ауа райының бұзылуына байланысты бірнеше республикалық автожолдарда көлік қозғалысына шектеу қойылды. 

kaz.inform.kz