Старшина ЖҰМАБАЕВ

Өрт сөндіру автокөлігін жүргізушінің міндеті тек өрт сөндірушілерді шақырту орнына жеткізу ғана емес, шындығында оның жауапкершілігі жоғары. Өрт сөндіру көлігінің жүргізушілері «қызыл қанатты» темір тұлпарларын үнемі жауынгерлік дайындықта ұстап, өрт және басқа да төтенше жағдайларды жою кезінде аталған техниканы ұршықша иіру солардың тікелей жұмысы. Жеке құрамды оқиға орнына жедел жеткізу, авариялық-құтқару жұмысын жүргізуге арналған құрал-жабдықтар мен ең бастысы – суды дер кезінде бере білу де солардың міндеті. Міне, осындай еңбектің соңында қарапайым жүргізушілер тұратындығын біреу білсе, біреу біле бермейді. Бүгінгі әңгімеміз аудандағы №10 өрт сөндіру бөлімінің аға жүргізушісі, азаматтық қорғау старшинасы Бақытбек Жұмабаев жайлы болмақ.

Ең жауапты жұмыстардың бірі өрт сөндіру көлігінің жүргізушісіне тиесілі десек, артық айтқандық емес. Себебі өрт сөндіру автомобильдерінің жүргізушілері әрқашан көмекке келуге дайын болып қана қоймай, өздерінің қызыл темір тұлпарларын толық жауынгерлік әзірлікте ұстайды. Сондай-ақ қоңырау түсе салысымен, көшені басына көтеріп «безілдей» жөнелетін бұл көлікті жүргізу де оңай шаруа емес. Оқиға орнына жетісімен, жүргізуші екенмін ғой деп қарап қалмайтыны тағы белгілі.

Иә, өрт сөндіру көлігінің жүргізушісі қырағылықты басты назарда ұстауы тиіс. Себебі көліктің цистернасында кем дегенде 4-5 тонна су болатыны анық.

Бақытбек Бекбергенұлы көп жыл өрт сөндіру көлігінің жүргізуші болып мол тәжірибе жинаған білікті маман. Ол өзінің жұмысы жайлы былайша баяндайды.

– Жеделдік – жұмыстың басты қаруы. Себебі өрт аумағына жету уақыты минут, секундпен есептеледі. Сондықтан жылдам жету – біздің басты міндетіміз. Бригада оқиға орнына қаншалықты тез жетсе, өрттің салдары соншалықты аз болатыны белгілі. Біз әрдайым оқыс жағдайға дайын болуға, шақырту түскен кезде барынша жедел қимылдауға тырысамыз. Алайда бекітілген жол ережесін сақтауды негізге алуымыз керек. Егер жылдамдықты асырсақ, көлік шайқалып, аударылып кетуі ғажап емес, – дейді жүргізуші.

Ақнұр ЕРДҮЙСЕНҚЫЗЫ