Тоқты құрбандыққа жарай ма?

Тоқты құрбандыққа жарай ма? Бұл сұраққа ҚМДБ Шариғат және пәтуа бөлімінің маманы Елбек Тасболатұлы жауап берді, - деп хабарлайды Massaget.kz тілшісі "Muftyat.kz"-ке сілтеме жасап.

Шариғатта құрбандыққа төрт түлік (қой, ешкі, сиыр, түйе) малды шалады. Ешкінің және қойдың жасы бір жылдан асқаны, сондай-ақ алты айдан асқан тоқты (қой секілді) ірі, қоңды болса құрбандыққа жарамды.

Сиырдың екі жастан асқаны, ал түйенің жасы бес жылдан асқаны құрбандыққа шалынады. Сонымен қатар сойылатын малдың кемшілік, кінәраты болмауы керек.

Пайғамбарымыз (оған Алланың салауаты мен сәлемі болсын) айтады:

"(Құрбандыққа) тек жасы толған малды ғана бауыздаңдар, тек шамаларың жетпесе, тоқты сойсаңдар болады".

Имам Әл-Касани былай дейді: "Түйе, ірі қара, қойдың жасына толғанын құрбандыққа шалуға рұқсат, тек қана тоқты үлкен болса ғана құрбандыққа жарайды".

Имам әл-Майдани  былай дейді: "Әл-жазағ деп: алты айға толған тоқтыны айтамыз, сол тоқты алыстан қарағанда жасқа толған қойлардың арасынан ажырата алмайтындай болуы керек".

Сондықтан алты айдан асқан тоқты бір жылға толған қойдың денесіндей ірі болмаса құрбандыққа жарамайды.