Қазақстанда 6 облыстың тұрғындарына қатты ыстық болатыны ескертілді
Қазгидромет алты өңірдің тұрғындарына аптап болатыны туралы ескертті, - деп хабарлайды Tengrinews.kz тілшісі.
Синоптиктер 11 маусымда Қазақстан аумағында байқалатын синоптикалық жағдай мен қауіпті ауа райы құбылыстары болжамын ұсынды.
"Атмосфералық фронттардың өтуіне байланысты ауа райының тұрақсыз сипаты сақталады. Қазақстан Республикасы аумағының басым бөлігінде күн күркіреп, жаңбыр жауады, еліміздің солтүстігінде нөсер, бұршақ жауады, бұрқасын болады, тек батыста және солтүстік-батыста жоғары қысымды өріс ықпалынан ауа райы жауын-шашынсыз болады. Республика бойынша жел күшейеді, түнде еліміздің солтүстік-батысында және солтүстігінде тұман түседі деп күтіледі", - деді метеорологтар.
Күндіз Алматы, Жамбыл, Батыс Қазақстан, Атырау, Маңғыстау облыстарында, сондай-ақ Жетісу облысында қатты ыстық сақталады.
