Колледжде тегін оқуға мүмкіндік молаяды
Коллажды жасаған – Қонысбай ШЕЖІМБАЙ, «EQ»
Колледжде тегін оқуға мүмкіндік молая түспек. Өйткені техникалық және кәсіптік білім беру ұйымдарында мемлекеттік тапсырыс ұлғайтылды. Бұл туралы Оқу-ағарту министрлігі хабарлады.
Жауапты министрліктің хабарлауынша, жаңа оқу жылында техникалық және кәсіптік білім беру ұйымдарындағы мемлекеттік білім беру тапсырысының көлемі 60 мың орынға көбейеді. Осылайша, мемлекеттік тапсырыс бойынша қабылданған білім алушылар саны 145 мың адамға жетеді.
Осыған орай мәлімдеме жасаған Оқу-ағарту министрлігіне қарасты техникалық және кәсіптік білім департаментінің директоры Әсет Мұханбетов: «Мемлекет басшысының тапсырмасымен сұранысқа ие мамандықтарға тегін техникалық және кәсіптік білім беру бойынша мемлекеттік білім беру тапсырысы республикалық бюджет есебінен 60 мың орынға ұлғайтылды. 2025 жылға қарай жастардың 100%-ы сұранысқа ие мамандықтар бойынша тегін техникалық және кәсіптік біліммен қамтамасыз етіледі», деді.
Мемлекеттік білім беру тапсырысы техникалық мамандықтар бойынша ұлғаяды: геология, машина жасау, энергетика, IT, металлургия, көлік т.б. Бүгінде техникалық және кәсіптік білімді мемлекеттік тапсырыспен қамту 80%-ға жетіп отыр.
Айта кетейік, жыл сайын кәсіпорындардың өтінімдері бойынша 10 мың талапкер қабылданады. Тапсырыс беруші кәсіпорындарға практика ұйымдастыру, түлектерді одан әрі жұмысқа орналастыру бойынша міндеттемелер беріледі.
egemen.kz
