Жуырда Ішкі істер министрлігі бағдаршамның сары түсіне байланысты жаңа жол ережесін жариялады. Халық арасында осы өзгеріске байланысты түрлі сауал туындап жатыр. Сонда бұдан былай сары түске өтуге де бағдаршамның қызыл түсі секілді тыйым салына ма?

Бұл сұраққа ІІМ М.Есболатов атындағы Алматы академиясы әкімшілік-құқықтық пәндер кафедрасы басшысының орынбасары, полиция подполковнигі Әсем Қырғызбекқызы жауап беріп, жаңа ереженің мәнін түсіндірді.

– Жол жүру ережелерінің 5-тарауы 24-тармағының 3-тармақшасына сәйкес бағдаршамның сары сигналы қозғалысқа тыйым салады. Бұған дейін бағдаршам­ның сары сигналы жүргізушіге қозғалысын аяқтауға мүмкіндік беретін. Алайда жүргізушілер бұл норманы дұрыс пайдаланбағандықтан, қиылыстарда соның кесірінен жол-көлік оқиғалары жиі тіркеледі. Сондықтан мұндай құқық бұзушылықтарды енді бейнебақылау камералары автоматты режімде тіркеп, сары түс жанғанда өтіп кеткендер Әкімшілік құқық бұзушылықтар туралы кодексіне сай жауапкершілікке тартылады.

egemen.kz