Облыс әкімі Нұрлыбек Нәлібаев қызылордалықтарды жаңа нысанның ашылуымен құттықтады.

– Мемлекет басшысы Қасым-Жомарт Кемелұлы «Ұлт мәдениеті – халық өмірінің айнасы. Еліміздің рухани дамуы ұлттық рухқа тікелей байланысты. Азаматтарымыздың рухы әрқашан биік болуы үшін мәдениетімізге, яғни руханиятымызға баса мән бергеніміз жөн» деген болатын. Сыр өңірі – шежіре тұнған, халықтың асыл мұралары сақталған алтын көмбелі мекен, қазақ театрының алғашқы қазығы қағылған жер. Аймағымыздың киелі сахнасынан мәдениет майталмандары мен өнер тарландары түледі. Қызылордада осындай өнер ордасына қажеттілік заман үдерістері мен көрермен талғамына сәйкес туындады. Аз ғана уақыттың ішінде құрыш қолды құрылысшыларымыздың кәсіби шеберлігі арқасында көз алдарыңызда сәні мен сәулеті келіскен «Өнер орталығы» бой көтерді. Ғимараттың салтанатты ашылуын әйел-аналарымыздың құрметіне, Сыр сұлуларының мерекесіне арнаудамыз. «Өнер орталығы» еліміздің рухани қазынасын толтыруға, мәдениеті мен өнерін асқақтатуға қызмет ете берсін! – деді аймақ басшысы.

Іс-шарада ҚР Мәдениет және ақпарат министрі Аида Балаева, Қазақстанның еңбек сіңірген қайраткері Алмас Алматов сөз сөйледі. Мұнан әрі қонақтар жаңа орталықты аралап, «Сыр өңірі өнер тұлғаларының экспозициялық картинасы» және «Сыр өңірі – Түркі өркениетінің бесігі» атты көрмені тамашалады.

Сондай-ақ бұл күні өңіріміз тағы бір ерекше сыймен толықты. «Өнер орталығының» ашылу салтанатында қазақ өнері мен мәдениетінің алтын қазығы саналатын Сыр өңіріне «ТҮРКСОЙ»-дың «Үздік мәдени өңір» атты сыйлығы табысталды. Сыйлықты халықаралық «ТҮРКСОЙ» ұйымының бас хатшысы Сұлтан Раев тапсырды.

Түбі бір түркі халықтарының мәдениетін ынтымақтастықта өркендетуді көздейтін халықаралық ұйымның пырақ бейнеленген арнайы сыйлығын алу – зор мәртебе. Түгел түркіге ортақ Қорқыт бабамыз тыныс тапқан мекендегі дәстүрлі, заманауи өнер мен мәдениет құндылықтарын ілгерілету бастамалары осындай жоғары марапатқа лайық деп танылды. Ерекше атап өтетін жайт, бұл номинация бұған дейін «Нобель» сыйлығының иегеріне және әлемге танымал әнші Димаш Құдайбергенге берілген.

Облыс орталығындағы мәдениет ошағының ашылу салтанатына біздің ауданнан да зиялы қауым өкілдері қатысып, керемет іс-шараның куәсі болып қайтты.

– Қызылорда қаласында 1000 адамдық сәулетті «Өнер орталығы» ғимараты ашылды. Қала қонақтары мен қала халқының қатысуымен ашылу салтанатының куәсі болдық. Еңсесі биік зәулім сарайдың алдында ұлттық киім киген қазақтың қыз-жігіттері мерекедегідей керемет әсер қалдырды. Сыр өнері саңлақтарының концерттік бағдарламасы жоғары деңгейде өтті. Халыққа қызмет ететін осындай орталықтардың аудандарда да ашылатынын естіп қуандық. Аймақ басшысының елдің рухани дамуы жолындағы ерен еңбегіне тәнті болдық, – дейді аудандық әйелдер кеңесінің төрайымы Гүлжауһар Раева.

Еске салсақ, 2022 жылдың қыркүйек айында Қызылордада 1000 келушіге арналған орталықтың іргетасы қаланған еді. Құны 3,7 млрд теңгені құрайтын зәулім ғимаратта симфониялық, эстрадалық және ұлттық өнер бағытындағы концерттік бағдарламалар, түрлі форматтағы қоғамдық іс-шаралар өткізіледі.

Айта кеткен жөн, Сыр өңірінің мәдениет пен өнер саласында көптеген жағымды жаңалық бар. Бұған дейін облыстық филармонияның құрамында ұлт аспаптар, камералық оркестрлер жұмыс жасаса, концерттерді көрермен талғамына сай, кәсіби әрі жанды дауыста ұсыну үшін тұңғыш рет симфония оркестрі құрылды. Облыстың мәдениет мекемелерінің мамандары Италия, Беларусь елдерінде біліктілігін арттырды. Алдағы уақытта Еуропадағы белгілі концерттік залдардың озық тәжірибелері енгізілмек.

Сырдың төрінде еліміздің барша аналарына арналған перзент сыйы – «Анаға тағзым» орталығы, жас отбасылардың бақыт мекеніне айналған «Отбасы орталығы» өз қызметін бастады. Мүмкіндігі шектеулі өнерпаздар шығармашылығын шыңдап, өнерін насихаттауға арналған «Инклюзивті театр» құрылды. Бұған дейін 10 жылға жуық үйірме ретінде жұмыс істеп келген «Жастар театры» өз алдына кәсіби ұжым болып өнер көрсетуде.

Елордада Астана қаласының 25 жылдығына орай «Сұлу Сырдан – ару Астанаға» атты Қызылорда облысының өнер күндері жоғары деңгейде өткізілді. Халықтың ыстық ықыласы мен қошеметіне бөленген іс-шара сәуірде Алматы қаласында да ұйымдастырылады.

Мәдениет және өнер, әдебиет өкілдерін қолдау мақсатында өткен жылдан бері тағайындалған «Тұран» сыйлығын табыстау дәстүрге айналады. Ұлыстың ұлы күні – Наурыз мейрамы қарсаңында «Жыраулар үйі» ашылады. Облыстық өлкетану музейінің құрылысы басталды. Жеті ауданда заманауи «Руханият орталықтары» салынуда. Жақын күндері балалар мен жасөспірімдерді өнерге баулып, шығармашылығын шыңдайтын «Шығармашылық академиясы» бой көтереді.