Жақында газетімізде асық ойыны арқылы желіде 30 миллионнан аса қаралым жинап, әп сәтте әлемге таралған мұғалім мен мектеп оқушысы туралы мақала жариялаған болатынбыз. Білікті ұстаз Шерхан Сламханұлы №107 мектептің дене шынықтыру пәнінен сабақ береді. Мақала даярлау барысында алдағы өтетін сайысқа дайындалып жатқанын айтқан еді. Міне, бүгінде сол жарыстан олжалы оралғанын жазып, сүйінші хабарын да жеткізді.

Мектеп оқушыларының бос уақытын тиімді пайдаланып, спортпен шұғылдану арқылы ерік-жігерін, табандылығын қалыптастыру, өскелең ұрпақтың саламатты өмір салтын ұстану дағдысын үйрету, спортпен шұғылдану мәдениетін арттыру мақсатында «Денсаулық әлемі» жобасы құрылған. Осы жоба аясында жас ұрпаққа ұлттық құндылықтарды дәріптеу, асық ату мен бес асық ойынын жандандырып, жоғары деңгейде оқушылардың ұлттық ойынға деген қызығушылығын қалыптастыру мақсатында Дүр Оңғар ауылдық мектебінде «Бес асық және асық ату» үйірмесі ашылған. Жақында көршілес Қазалы ауданында 2008-2010 жылы туған  жасөспірімдер мен 2011-2013 кіші жасөспірімдер арасында осы ойын түрінен Қазақстан Республикасы чемпионатына іріктеу жарысы өтті.

Сайыс нәтижесінде 2008-2010 жылы туған жасөспірімдер «бес асық» ойыны бойынша қыздар ІІ орынды еншілесе, жекелей сында Інжу Амантаева І орынға қол жеткізді. Ал 2011-2013 жылы туған кіші жасөспірімдер арасында қыздар ІІІ орынды иеленді. 2008-2010 жылы туған жасөспірімдер асық ату бойынша І орынға жайғасты. Жекелей сында Ерхан Нұрланұлы мен Рамазан  Мәлікайдаров өз топтарынан оқ бойы озық болды. 2011-2013 жылы туған кіші жасөспірімдер арасында жігіттер ІІ орын еншілесе, жекелей сында Ернұр Саяшбеков І орынды қанжығасына байлады. Айта кетейік, І орын алып озат болғандар алда өтетін Қазақстан Республикасы чемпионатына жолдама алып отыр.