– Бұл жаңалықты жаңа жыл қарсаңында естідім. Көп адам қатысып жатқан соң орын аламын деп ойламадым. Қыркүйектің басында «Күзгі бақта», «Шабыт» деген екі өлеңімді жолдадым. Біріншісі, табиғат лирикасы болса, екінші өлең еркін тақырыпта болды. Өлеңдер қазақ тілінде, сонымен қоса аудармасы қоса жіберілді. Бірінші рет қатысып тұрмын. Шынымды айтсам, арада 3-4 ай уақыт өткесін бе, конкурсты тіпті ұмытып та кетіппін. Халықаралық дәрежедегі белгілі ақынжазушылар – Сергей Антипов, Руслан Пивоваров, Борис Селезнев, Алексей Калакутин және байқаудың бас директоры Светлана Мельникова-Пивоварова (Беларусь) мен коодинатор-директор Татьяна Елисееваның (Ресей) төрелік етуімен конкурстың қорытындысы маған да жіберіліпті. Соның ішінде «Шетелдік бағыт» номинациясы бойынша қазақстандық әріптесім Айнұр Құмарханова І дәрежелі орыннан көрінсе, мені ІІ дәрежелі лауреат атағына лайық деп тауыпты. Ал конкурстың мақсаты ауқымды – әлем елдеріндегі ақындардың басын қосу және шығармашылығын шыңдау, – дейді жеңімпаз бізге берген сұхбатында.

Руслан Сәулебекұлы өнер мектебінің баян аспабына шәкірттер баулып жүрген білікті музыкант, ұлағатты ұстаз. Сонымен қатар қолы қалт еткенде жазу үстеліне отырып, бір сәтке шығармашылықпен тыныстап, поэзия әлеміне саяхаттайды. Оның туған жерге, елге, Отанға, табиғат мезгілдеріне арналған өлең-жырлары шетелдік, отандық бұқаралық ақпарат құралдарында үзбей жарияланып тұрады.

Байқау жеңімпаздары осы жылдың ақпанында Ресейде өтетін фестивальде «Арина НН» халықаралық әдеби алманахының құрметті дипломы және естелік сыйлығымен марапатталатын болады.

Жерлесіміздің сәттілік серігі болсын!