Ізденіс жетістікке жетелейді

Осы тақырыппен аудандық білім бөлімінің ұйымдастыруымен 15-17 жастағы оқушылар арасында өткен «Менің жобам – менің елім!» атты жоба байқауында «Менің Отаным – менің бастамам» номинациясы бойынша No109 орта мектептің 10-сынып оқушысы, шәкіртім Нұрсезім Мырзабекова жүлделі І орынмен марапатталып, облыстық байқауға жолдама алды. Білімді жастың болашағынан үлкен үміт күте отырып, оның байқауға дайындаған тақырыбынан қысқаша үзінді келтіре кетуді жөн көрдім.

Биыл ауылымызда «Қармақшы құс фабрикасы» ашылды. Оған «Ақтөбе и К» ЖШС директоры Нұрлан Іздібаев басшылық етеді. Құрылыс жұмысы 2016 жылы басталып, осы жылы пайдалануға берілді. Бұл жоба – жалпы құс шаруашылығы республикамыз- да саусақпен санарлық десек қателеспейміз. Оның қызмет түрлеріне келсек: құс етінен жасалған өнімдерді өндіру. Фабрика жылына 1500 тонна құс етін өндіруді қолға алған. Ет бағытында жұмыс істейді. Ол бөліктелген түрде салқындатылып, өндіріске шығарылады. Өнімнің 70 пайызы шетелге экспортталады.

Құс шаруашылығында келешекте 150-200 адам жұмыс жасайды деп күтілуде. Фабрика әкімшілік ғимараты, балапан шығару цехы, 6 балапан өсіру қорлары, тауық сою цехы және күзет ғимаратынан тұрады. Балапан шығаратын цех құралдары және мұздатқыш, сою цехы жабдықтары Қытайдан әкелінген. Құс өсіретін қорлар Бельгиядан, қалдық заттарды өңдеу аппараты Ираннан алдырылған. 57000 дана тауық жұмыртқасы Түркиядан ұшақпен әкелініп, Алматыдан арнайы көлікпен жеткізіліп, инкубатор цехына қойылды.

«Ауылына қарап, азаматын таны» деген аталы сөзге арқау болған ауылымыздың еңбеккерлерін паш ете отырып, аудандық байқауда жеңіске жеткен Нұрсезімге алдағы күндерге сәттілік тілей отырып, облыстық кезеңнен де жүлделі оралуына тілек білдіреміз.