Егіс көлемі 4,8 мың гектарға ұлғайды
Биыл облыс бойынша 193,4 мың гектарға ауыл шаруашылығы дақылдары егіліп, егіс көлемі 4,8 мың гектарға ұлғайған. Бұл туралы Өңірлік коммуникциялар қызметінің ақпарат алаңында облыстық ауыл шаруашылығы және жер қатынастары басқармасының басшысы Талғат Дүйсебаев мәлімдеді.
Ал егістік басындағы еңселі жұмыстардың нәтижесінде биыл 89 мың гектарға ақ күріштің дәні себілді. Ала жаздай бейнеттен бел жазбай еңбек еткен диқандардың арқасында 503,3 мың тонна өнім қамбаға құйылды. Бұл ретте су тапшылығы тығырыққа тіресе де, тіршілігін тоқтатпаған диқаншылар қауымның еңбегі орасан.
-Өздеріңіз білетіндей, егіншілердің басты мәселесі - су тапшылығы. Осыған сәйкес, егіс көлемін әртараптандыру бағытында 3 мың гектарға ауыл шаруашылығы дақылдары егілді. Су үнемдеу технологиясын пайдалану арқылы да тиісті жұмыстар қолға алынды. Жалпы күзгі егін жинау науқанына 4 287 бірлік техника жасақталып, толық егін егу науқанына қатысты. Осы атқарылған шаралардың нәтижесінде, 521,2 мың тонна дәнді дақыл, оның ішінде 503,3 мың тонна ақ күріш қамбаға құйылды. Сондай-ақ, 4,8 мың тонна майлы дақыл, 94,4 мың тонна картоп, 398,7 мың тонна көкөніс пен бақша өнімдері жиналды, - деді басқарма басшысы Талғат Тұрсынұлы.
@Қызылорда облысының Өңірлік коммуникациялар қызметі
