«Қарызсыз қоғам» жобасын ерекше атап өтті
qarmaqshy-tany.kz ҚР Парламенті палаталарының бірлескен отырысында Мемлекет басшысы Қасым-Жомарт Кемелұлы Тоқаев Қазақстан халқына «Әділетті Қазақстанның экономикалық бағдары» атты Жолдауын жариялады. Онда қоғамда болып жатқан біршама мәселенің тінін тарқатып, нақты тапсырмалар берді. Сондай-ақ Президент азаматтардың қаржы сауатын арттыру бойынша «AМАNAT» партиясының «Қарызсыз қоғам» жобасын ерекше атап өтті.
«...Соның арқасында еліміздің 8 аймағында 20 мыңнан астам адам қаржылық сауатын арттырды. Олардың көпшілігі – 10 және одан да көп несие алған адамдар. Бұл жоба аз уақытта өзінің тиімділігін көрсетті. Үкіметке «AМАNAT» партиясымен бірлесіп, оның ауқымын кеңейтуді тапсырамын. «Қарызсыз қоғам» жобасының игілігін бүкіл еліміз көруі қажет», – деді Қасым-Жомарт Кемелұлы.
Жасыратыны жоқ, көп отандастарымыз қаржыны қалай басқару керегін, «несие» ұғымының астарында не жатқанын нақты біле бермейді. Соның салдарынан адамдардың банк пен микроқаржы ұйымдарына берешектері көп. Аталған жоба аясында адамдар бизнес жоспар құруға, жеке және отбасылық бюджеттің құрастырылуын, қаржылық мақсаттарды дұрыс қою мен оған жету үшін жасалатын қадамдарды үйреніп шығады.
Дастан БУХАНОВ,
«AMANAT» партиясы аудандық филиалының
атқарушы хатшысы
