Қамқорлық құшағы кеңейе түспек

Ал, Жосалы кентінде аудан әкімі Жандос Еркінбек Ұлыстың Ұлы күні қарсаңында ұйымдастырылып жатқан бірқатар іс-шараға қатысып, жүрекжарды жылы лебізін білдірді.

Аудан басшысы алдымен «Қармақшы ата» мешітінде өткен «Наурыз шапағаты» атты қайырымдылық акциясына қатысып, аудандағы әлеуметтік жағынан аз қамтамасыз етілген отбасыларды қолдау шаралары жүйелі түрде іске асырылатынын айтты. Ыстық ықыласын жеткізе келе тұрмысы әлжуаз, көпбалалы отбасыларға азық-түлік себетін тапсырды.

Одан соң аудан әкімі кент орталығындағы Ерназар Сексенбаев атындағы көше бойында орналасқан әлеуметтік маңызы бар азық-түлік өнімдерінің жәрмеңкесіне барды. Молшылық мерекесінде кент тұрғындарына азық-түлік өнімдері нарықтағы бағадан 10- 15 пайызға арзан бағада сатылды. Оның ішінде картоп, жуа, қырыққабат, кондитерлік өнімдер мен мал азығы – табиғи және жоңышқа престері сатылымға шығарылды.

Мерекелік іс-шара одан әрі Жосалы кентінің кіреберісіндегі «Қобыз» монументінде ағаш отырғызу акциясымен жалғасты.

Акцияда аудан басшысымен бірге еңбек ардагерлері, үкіметтік емес ұйым өкілдері, қоғам белсенділері мен жастар тал көшеттерін отырғызып, тазалық жұмыстарын жүргізді.

Мерекеге орайластырылған тазалық акциясында аудан әкімі Жандос Еркінбекұлы көпшілікті жыл басы – Наурыз мейрамымен құттықтап, күн жылып жылт еткеннен бастап бұлақтың көзін ашып, ағаш отырғызу ежелден келе жатқан салт-дәстүр және бүгінгі жастарға көрсетер үлгі-өнеге екенін тілге тиек етті. Сондай-ақ, қатысушыларды ауданның санитарлық-тазалығын жақсартуға, көркейтіп-көгалдандыруға үлес қосуға үндеді.

Іс-шара барысында аудан өнерпаздары ән-жырдан шашу шашып, жиналған жұртшылыққа мерекелік көңіл-күй сыйлады.

«Жаңбырменен жер көгерер, батаменен ел көгерер» дегендей, еңбек ардагерлері акцияға қатысушыларға, елдің болашағы – жастар өкілдеріне аталық батасын беріп, тілектерін жеткізді.

Бұл күні ауданда сенбілік жұмыстары серпін алды.

Нұрбай ЖАНӘДІЛОВ