Құрметті аудан тұрғындары!
Көктемнің шуағымен бірге шаруаның қызу тіршілігі басталып, ауданда санитарлық-тазалық жұмыстары қарқынды жүруде.
Өздеріңіз білетіндей, жыл сайын дәстүрлі түрде тазалық айлықтары аясында сенбіліктер ұйымдастырылып, ауданның санитарлық жағдайын жақсартуға оң әсерін тигізіп келеді.
Осы мақсатта, бүгін кент, ауылдық округ әкімдері, мекеме, кәсіпорын басшылары, ардагерлер, қоғамдық ұйымдардың жетекшілері, қоғам белсенділері мен ерікті жастардың қатысуымен арнайы кездесу өткіздім.
Баршамызға ортақ мекен – Қармақшы ауданын көркейту-көгалдандыру жұмыстарына атсалысуға шақырып, тиісті сала басшыларына тазалық жұмыстарын жүйелі түрде ұйымдастыру жөнінде нақты тапсырмалар бердім.
Дегенмен, бұл тазалық жұмыстары – жалпыхалықтық сипат алмаса, әр тұрғынның өз ауласын, көшесін таза ұстауға ықыласы болмаса, қоғамда экологиялық мәдениет қалыптаспаса барлық атқарылып жатқан жұмыстардың нәтижесі еш болары анық.
«Тазалық – тазаланған жерде емес, тазалық сақталған жерде» дегендей ауданымызды таза ұстау – өз қолымызда.
Ауданның әрбір тұрғыны өзінің ауласының және көшесінің тазалығына жауапкершілігін сезініп, айналасын тазартса, бұл ынтымағымыздың белгісі, береке-бірлігіміздің бастауы болар еді.
Осы иігілікті жұмыстарға барша Қармақшы жұртшылығын қолдау көрсетуге және ауданымыздағы санитарлық-тазалық жұмыстарына атсалысуға шақырамын!
