Газға қосылу үшін құжат алу тәртібі өзгерді
Kyzylorda-news.kz. Газға қосылу кезінде бірінші құжатты алу тәртібі жеңілдетілді. Енді техникалық шарттар тегін және онлайн режимде беріледі, деп хабарлайды Энергетика министрлігінің баспасөз қызметі.«Техникалық шарттарды алуға өтінімді онлайн режимінде – «ҚазТрансГаз Аймақ» АҚ сайтындағы тұтынушының жеке кабинетінде, сондай-ақ компанияның өңірлердегі өндірістік филиалдарының мекенжайлары бойынша беруге болады», - деп жазылған хабарламада.
Министрлік өтініш өңделгеннен кейін дайын техникалық шартты SMS хабарлама түрінде жолданған сілтемеден жүктеп алуға болатынын түсіндірді.
«Техникалық шарттарды бергені үшін ақы талап етсе, сондай-ақ компания қызметкерлерінің заңсыз және сыбайлас жемқорлық белгілері бар әрекеттерінің басқа да фактілері анықталса хабарлауды сұраймыз. «ҚазТрансГаз Аймақ» АҚ бірыңғай байланыс орталығына 5169 телефоны немесе +7 777 121 26 26 нөміріндегі мессенджерлер арқылы жазып, қоңырау шалуға болады. Қазақстан аумағынан қоңырау шалу тегін», - деді министрліктегілер.
