«Ауыл шаңырағындағы шаттық»
qarmaqshy-tany.kz Ауылдық мәдениет үйінде Жаңа жыл мерекесіне арналған «Ауыл шаңырағындағы шаттық» атты салтанатты жиын өтті.
Мерекелік шарада ауылдық округ әкімі Нұрлыбек Сайымов құттықтау сөз сөйлеп, жыл көлемінде атқарылған іргелі істерге тоқталды.
- Баршаңызды санаулы сәттерден соң табалдырығымыздан аттағалы тұрған Жаңа 2023 жылмен құттықтаймын! Жаңа жыл өткенге баға беріп, атқарылған істі саралайтын кезең. Жыл сайын халықтың әл-ауқаты мен тұрмыс-тіршілігін жақсартуға бағытталған түрлі бағдарламалар аясында тұрғындарымыздың өмір тынысы жақсаруда. Біздің табыстарымыз бен жетістіктеріміз 2023 жылы да жаңа идеялық ізденістермен және бастамашыл қадамдармен жалғасын таба беретін болады, – деді ауыл әкімі.
Мұнан соң жыл көлемінде әр сала бойынша табысты еңбегімен озық шыққан жыл үздіктеріне түрлі номинациялар беріп, елеулі еңбегімен жетістікке жетіп жүрген мамандарға құрмет көрсетті.
Салтанатты шара әрі қарай ауыл өнерпаздарының мерекелік концерттік бағдарламасына ұласып, әннен шашу шашылды.
