qarmaqshy-tany.kz Бүгін Қармақшы ауданы бойынша білім бөлімінің ұйымдастырумен Т.Көмекбаев атындағы №250 мектеп-лицейі базасында "Жеке тұлғаны қалыптастырудағы өнер мен дебаттың маңызы" атты облыстық семинар өтіп жатыр.

Семинардың мақсаты: Өскелең ұрпақты қазақстандық патриотизмі мен азаматтылығын қалыптастыру, мектептегі дебат қозғалысын дамыту және қолдау, тәрбие бағыттарына сәйкес пікірсайыс ойындарын жастар арасында насихаттау жұмысын жандандыру.

Облыстық семинарға Аудандық білім бөлімінің басшысы Абдазиева Гүлзира Мәжитқызы, "Дарын" облыстық қосымша білім беру орталығының бөлім басшысы Иманзадаева Гүлбану Күзенбайқызы және облыстан, әр ауданнан дебатқа түсетін оқушылар қатысты.

Семинар қатысушыларына ең алдымен ауданның домбыра үйірмесі өнерін көрсетіп, білім бөлімінің басшысы Абдазиева Гүлзира Мәжитқызы сөз алып, ауданымызда осы кезге дейін түрлі деңгейде оқушылар арасында дебат сайыстары ұйымдастырылып, шәкірттеріміз облыстық, республикалық деңгейлердегі бәсекелерде үздік атанғанын айтып өтіп, бүгінгі дебат сайысына қатысатын оқушыларға ізгі тілегін білдіріп, ұшқыр ой алаңында жеңіске жетулеріне сәттілік тіледі.

Осы тұрғыда бұл жұмыстарды одан әрі жаңғырту үшін «Өрнек өнер» орталығы жаңадан ашылып, салтанатты шараның лентасын білім бөлімінің басшысы Абдазиева Гүлзира Мәжитқызы және "Дарын" облыстық қосымша білім беру орталығының бөлім басшысы Иманзадаева Гүлбану Күзенбайқызы кесіп, жылы лебіздерін білдірді. Қонақтарға балалар жылына орай жасалынған оқушылардың көрмесінен таныстырылым жасады.

Мұнан соң, «Мектеп театры» жобасы бойынша құралған «Қуыршақ» театры «Жеті лақ» қойылымын қойып, қонақтарға ерекше көңіл-күй сыйлады.