Қармақшы ауданының тұрғындары мен жүргізушілерінің назарына
qarmaqshy-tany.kz Қармақшы ауданының полиция бөлімінің Жол және техника инспекциясы тобы сіздерді қыс мезгілі жақындап ауа-райының күрт өзгеруіне байланысты ауданымыздың автомобиль жолдарында және елді-мекен ішіндегі қауіпті бұрылыстарда, жаяу жүргінші өткелдерімен көше қиылыстарында, автокөлікті аса сақтықпен мұқият жүргізуді және белгіленген жылдамдық режимінен асырмауды сұрайды.
Ауа-райының құбылмалы болуы кезінде тұман, қар, көктайғақ қыс мезгілінде жол апатының бірден бір факторы болып есептеледі. Сол себепті көлік құралының техникалық жағдайына аса мән беру талап етіледі. Атап айтқанда дөңгелектердің қысқы мезгілге сай болмауы және протектор үлгісінің стандартқа сәйкес келмеуі кезінде, көлік құралын басқаруға тиым салынатындығын ескертеді. Сонымен қатар ауа-райының өзгеруі жөнінде ұялы телефондарыңызға хабарлама түскен кезде немесе басқа да бұқаралық ақпарат көздерінен тұман, қар, көк тайғақ дегенді естісеңіз, елді-мекеннен тыс автомобиль жолдарына шығуға шектеу қоюларыңызға кеңес береміз.
Әрбір жүргізуші көлік құралын басқару кезінде жол жүру ережесінің талаптарын сақтай отырып, бар жауапкершілігімен қараса жол апатының алдын алып, өзінің де, өзгенің де өмірін сақтап қалады.
