Сыбайлас жемқорлық қоғам дерті

Еліміздің демократиялық, зайырлы, құқықтық және әлеуметтік мемлекет ретінде орнықтыру жолындағы ең басты қауіп-қатерлерінің бірі сыбайлас жемқорлық екені барлығына белгілі.
Сондықтанда оны болдырмау, алдын-алу мақсатында елімізде көптеген іс-шаралар жоспарланып, жүзеге асырылуда. Сыбайлас жемқорлық еліміздің экономикасы мен ұлттық қауіпсіздігіне орасан зор нұқсан келтіріп қана қоймай, нарықтық экономиканың дамуына залалын тигізеді. Сол себепті онымен күрес мемлекеттік саясаттың басым бағыттарына айналған.
Сыбайлас жемқорлық дәрі беріп емдейтін сырқат емес. Сыбайлас жемқорлық әрекеттері бойынша тиісті шара қолданудың негізі - ол азаматтардың арыз-шағымы.
Мемлекетіміздің әрбір азаматы Қазақстан Республикасының Конституциясын және заңдарын сақтауға, басқа адамдардың құқықтарын, бостандықтарын, абыройы мен қадір-қасиетін құрметтеуге міндетті. Осы мақсатта бүгін «AMANAT» партиясы Қармақшы аудандық филиалының мәжіліс залында аудандық төтенше жағдайлар бөлімі қызметкерлерінің қатысуымен «Сыбайлас жемқорлық қоғам дерті» тақырыбында кездесу болып өтті. Келелі кездесуді «AMANAT» партиясы аудандық филиалының консультанты А.Тулебеков жүргізіп отырды.
Кездесу барысында аудандық төтенше жағдайлар бөлімі басшысының міндетін атқарушы Е.Назарқұлов өз кезегінде сыбайлас жемқорлықпен қарсы күрес мемлекеттік саясаттың басым бағыттарының бірі. Сыбайлас жемқорлыққа қарсы күрес Қазақстан Республикасы азаматтарынан адалдықты, шындықты, заңдылықты сақтауды сонымен қатар жауапкершілікті талап ететіндігін атап өтті. Аталған кездесу барысында сыбайластықтың соңы немен аяқталатындығы, зияны мен кесірі туралы түсіндірме жұмыстары жүргізілді.