АҚШ-қа ауысқан Ибрагимович 33 метрден гол салды
«Лос-Анджелес Гэлэкси» клубына жаңадан ауысқан Златан Ибрагимович америкалық Басты футбол лигасында (MLS) екі гол салып, көзге түсті.
Кездесудің 77-минутында «Лос-Анджелес» шабуылшысы Ибрагимович 33 метрден доп теуіп, қарсыластар қақпасына дөп тигізді. «Аш арыстан», – деп жазды баспасөз қызметі роликтің сипаттамасында. Қосымша уақытта швед ойыншысы баспен гол салып, есепті еселеді (4:3).
Ибрагимович «Гэлэкси» клубына ауысқаны жайлы 23 наурызда белгілі болды. Осыған дейін ол ұлыбританиялық «Манчестер Юнайтед» сапында өнер көрсеткен еді.
