Заңдылықтар нығая түсті

Аудандық прокуратураның бастамасымен 2021 жылдың 1 шілдесінен бастап қолданысқа енетін «Қазақстан Республикасының әкімшілік рәсімдік-процестік Кодексі» талаптары бойынша түсіндірме жұмыстарын жүргізу мақсатында Жосалы кенті әкімшілігінде мәжіліс өтті.  Оған жергілікті атқарушы органдардың басшылары мен құқық қорғау органдарының қызметкерлері қатысты.
Жиында аудандық прокуратураның прокуроры Е.Есетов Тәуелсіз Қазақстанның тарихында тұңғыш қабылданып отырған жаңа Кодекс мемлекеттік органдардың ішкі әкімшілік рәсімдерін, әкімшілік рәсімдерді жүзеге асыруға байланысты қатынастарды, сондай-ақ әкімшілік сот ісін жүргізу тәртібін реттейтіндігін атап өтті.
– Жаңадан қабылданған Қазақстан Республикасының әкімшілік-рәсімдік процестік Кодексі азаматтардың құқығын қорғаумен қатар мемлекеттік орган мен жеке және заңды тұлғалар арасындағы туындаған дауларда теңсіздікті жоюға бағытталған. Себебі әкімшілік рәсімдердің міндеттерінің бірі жария-құқықтық қатынастарда жеке және қоғамдық мүдделердің теңгеріміне қол жеткізу болып табылады. Кодекс талабына сәйкес дау айту жөніндегі талап қою бойынша дәлелдеу ауыртпалығы талап қоюшыға емес, ауыртпалық түсіретін актіні қабылдаған органға, яғни жауапкерге жүктеледі, – дейді аудандық прокуратураның прокуроры.
Жаңа Заңнама жеке және заңды тұлғалардың жария құқықтарын, бостандықтары мен мүдделерін толық іске асыруына ықпал етіп, осы саладағы заңдылықты нығайтуға бағытталады.
А.Ердүйсенқызы