– Жалғызбасты қарттарға, үлкен кісілерге, мұқтаж отбасыларға тамақ тасып, керек заттарды апаруда көлік қажет болды. Осы тұстан қиындық көп кезікті. Өзім де ауылда болмадым. Бірақ такси жібертіп, діттеген жерге қатынап отырдық. Кейін ойлана келе осы бастаманы неге қолға алмасқа деген ой туды. Аштық. Группаларға таратып, біршама ерікті жиналды. Мақсатымыз тегін көлік қызметін көрсетіп, алдағы уақытта автоеріктілер қатарын көбейту, – дейді ерікті Азамат Бегімұлы.

Ал 24 жастағы Әзиз Нұртайдың айтуынша, автоерікті болу мақтаныш емес. Ол – бір Алланың разылығы үшін жасалатын үлкен жақсылық.

– Автоволонтер тобы ашылғаннан бастап чатқа қосылдым. Өзім Атырау қаласында жұмыс істеймін. Демалысқа келгенде такси болып қосымша еңбек етемін. Сол аралықта осылай тегін қызмет көрсетіп, еріктілікпен айналысамын. Істің қайырлысы – қайырымдылық екені баршаға аян. Сол қайырлы іспен біз болып, сіз болып атсалыссақ нұр үстіне нұр болар еді, – дейді ол.

«Кең пейілді кемімес». Қазір еріктілер тобы қолдан келгенше көмегін көрсетуде. Бүгінде олар қайырымдылық шараларының басы-қасында жүр. Бірі – мұқтаж азаматтарға қол ұшын созса, енді бірі – демеу болуда. Ендігісі – автоерікті болып, сол жақсылықтың көпіріне айналды.

Ал жұма күндері жалғызбасты аналар, көпбалалы аналар мен қарттарды тегін таситын Асылжан Маханбетовты бірі білсе, бірі білмес. Вахталық жұмыс істейтін ол келген бір демалысында тегін такси қызметін көрсетеді. Онымен қоса жалғызбасты қарт кісілердің ауласын жинап, қарын күрейді. Бізбен тілдескенінде ерікті жас жұмыста екен. Ал ауылға оралған тұста жаңадан ашылған автоволонтер тобымен тегін көмек көрсетпек ниетте.

«Біз біргеміз» дейді еріктілер. Бұл – аудан еріктілерінің ұранына айналған сөз. Ал ұйымдастырушылар «Қай уақытта болмасын қол ұшын созуға даярмыз» дейді әңгімемізді түйіндей.