Ұлы Абай «Пайда ойлама, ар ойла, талап қыл артық білуге» деп адам бойындағы арды биік қойған. Расымен де ар-ұяты терең, тәрбиелі, адал жан ешқашан біреудің ала жібін аттамайды. Тәрбие – тал бесіктен. Кемеңгер ойшыл әл-Фараби «Адамға ең бірінші білім емес, тәрбие керек. Тәрбиесіз берген білім – адамзаттың қас жауы, ал келешекте оның өміріне қауіп әкеледі» деген. Сол үшін бала тәрбиесінде кішкентайынан арлы болуды, ақылмен әрекет етуді құлағына құйып өсіру қажет. Егер барлығы керісінше болса ол тойымсыздыққа әкеп соқтыруы мүмкін. Кез келген қызметкер қалтасын ойламай, сыбайлас жемқорлықпен күресуі керек. Оны ең алғаш өзінен бастап, ертеңгі ұрпағының бақытты болашағы үшін адалдық алаңын құруы тиіс. Ал ұрлау – тұтас Отанына жасаған опасыздық. Парасаттылық пен ізгілік қағидасы сақталғанда ғана Қазақстан келешекте жемқорлықсыз мемлекетке айналады деп сенемін.