Желаяқтар жарысы Анталия қаласында өткен. Халықаралық сайысқа түркиялықтармен бірге Франция, Германия және Қазақстаннан жасы сексеннен асқан спортшылар қатысқан.

Жастайынан спортқа жақын қазалылық қария мыңнан астам желаяқтың арасынан озып шығып, алтын медаль алған.

Теміржол саласының ардагері Аққоян қария оқушы күнінен-ақ бокспен шұғылданған. Әуе-десант әскері қатарында азаматтық борышын өтеген. Сондай-ақ ол 281 мәрте парашютпен секіріпті.

Бүгінде Аққоян Ырсалиев ардагерлер арасында өтетін жарыстарда жүлделі орындар иеленіп жүр. Сондай-ақ, ол күн сайын таңертең жүгіріп, жаттығу жасайды.

2011 жылдан бері Алматы марафонына қатысып келеді. 2015 жылы аталмыш жарыста алтын медаль алған. Сергектікті серік еткен қария күн сайын кемінде 10 шақырым жүгіреді. Ал жарысқа барар алдында 30 шақырымды бағындырады екен.

Мэлс Молдағалиевтің айтуынша, оның салауатты өмір салтын ұстанып, күнделікті суға түсіп жүргеніне 40 жылдан астам уақыт болған.