Сыр медицинасы мен журналистикасы орны толмас қазаға ұшырады. Қазақстанның құрметті журналисі, денсаулық сақтау саласының үздігі, денсаулық сақтау саласының жоғары санатты ұйымдастырушысы Амангелді Суханберлиев ағамыз бұ фәниден бақиға аттанғаны туралы суыт хабар естідік. Көңіл шіркін сене алмайды. Осыдан 2-3 күн бұрын ғана дидарласып, әңгімелескен едік. Қаралы хабарды естіп, есеңгіреп қалдық. 

Амангелді Нұғыманұлы талай жанды ажал тырнағынан арашалап қалған білікті хирург, сондай-ақ медицина саласының мамандарын дайындап, тәрбиелеген ұлағатты ұстаз еді. Журналистика саласына да елеулі еңбегі сіңді. Дәрігер ағамыз «Нұр-Жан» журналын шығарып, аймақ баспасөзінің дамуына үлес қосты. 

Ағамыздың мінезі қайсар, әрі әділ болатын. Басқаның бақыты үшін өмір сүретін қайырымдылығы, мейірімділігі өз алдына әңгіме. Үлкенге құрметі, кішіге ізеті мен қамқорлығы да ерекше. Осындай ардақты ағамыздан айырылып қалдық. 

Марқұмның отбасына, балаларына, жақындарына көңіл айтамыз. 

Ағамыздың иманы жолдас болсын! Бақұл бол, аға!