Бүгін Жосалы кентінде орналасқан дене шынықтыру және спорт кешенінде балалар мен жеткіншектер және жасөспірімдер арасындағы таэквондодан Қармақшы ауданының ашық біріншілігі өтуде.

Шараның ашылуына қатысқан аудан әкімінің орынбасары Меңлібаев Еркебұлан Қайырбекұлы балалар мен жасөспірімдер арасында салауатты өмір салтын қалыптастыру, жастар арасында спортпен шұғылдану бағытында өткізіліп отырған шараның маңыздылығына тоқталып өтті. Жарысқа қатысушыларға сәттілік тілеп, ізгі лебізін жеткізді.

Аудандық дене шынықтыру және спорт бөлімінің басшысы Мырзабаев Нұрболдың айтуынша қазіргі таңда аудан көлемінде таэквондо клубтары мен үйірмелері белсенді жұмыс атқаруда. Шәкірттері облыстық республикалық жарыстарда топ жарып келеді.

Бүгінгі өткізіліп отырған балалар мен жеткіншектер және жасөспірімдер арасындағы таэквондодан Қармақшы ауданының ашық біріншілігіне Қызылорда қаласы мен Байқоңыр қаласынан және Шиелі, Қармақшы аудандарынан 6 команда 150-ге жуық жас спортшылар белсенділікпен қатысуда.