Көшпенділер ойындары: Қазақ балуаны аба күресінен чемпион атанды

Қырғызстанның Шолпон-Ата қаласында өтіп жатқан ІІІ Дүниежүзілік көшпенділер ойындарында аба күрестен (түрік күресі) 65 килограмм салмақта қазақстандық балуан Әуесхан Құрбанқұлов алтын алды, деп хабарлайды Baq.kz ақпарат агенттігі.

Ол финалда ирандық Реза Тажизадешариды ұтты. Жартылай финалда Ресей балуаны Илнар Закировты айқын басымдықпен жеңді.

Құрбанқұлов 2017 жылы Түрікменстан астанасы Ашхабадта өткен жабық стадиондағы V Азия ойындарында белбеу күресінен (Алыш) қола жүлдегер атанған.

Айта кетсек, Дүниежүзілік көшпенділер ойындары 2-8 қыркүйек аралығында өтеді. Жаһандық жарысқа 80-нен астам елдің 3000 жуық спортшысы қатысуда. Олар 37 спорт түрінен бақ сынайды. Дүбірлі додада Қазақстанның намысын 134 спортшы қорғайды.

Baq.kz