Ванес Мартиросян: Бұған дейін мені ешкім бұлай қатты ұрмаған

Америкалық бокс Ванес Мартиросян  қазақстандық Геннадий Головкиннен  екінші раундта нокаутпен жеңілгеннен кейін отандасымыздың соққы күші қандай екенін айтып берді.
–Пойыз астында қалғандай болдым. Бір ғана емес, барлық соққысы сондай болды. Бұған дейін мені ешкім бұлай қатты ұрмаған. Головкин – сұмдық панчер. Әрбір соққысы дәл әрі мығым болды. Головкин соққысының күшімен таңғалдырды. «Канелоның» әлгі етті не үшін жегенін түсіндім», – деді Мартиросян жекпе-жектен кейін.
Америкалық карьерасында алғаш рет уақытынан бұрын жеңіліп отыр. Жеңілістерінің жалпы саны – 4. Бұған дейін Мартиросян үш мәрте төрешілердің шешімімен қарсыласқа есе жіберген еді.  Ал мұның алдында Головкин Мартиросянның бірнеше жақсы соққы дарытқанын айтып берген болатын.
–Тамаша күйдемін. Қазақстандық достарыма көп рақмет, қолдаған барша адамға рақмет. Ванес – тамаша боксшы, бірнеше жақсы соққысын дарытты. Бірінші раундта кездесу қиын болады деп ойладым, бірақ екінші раундта бәрі де бітті, – деді Головкин.
tengrinews.kz