Департаменттегі Наурыз-думан
Ұлыстың Ұлы күні Наурыз - мейірім мен молшылықтың, жақсылық пен жасампаздықтың мерекесі. Аталмыш мейрамды Қызылорда облысы қоғамдық денсаулық сақтау департаментінің ұжымы да дүркіретіп тойлады. Мейрам ерекше шаттықпен басталды, әріптестер төс түйістіріп, бір-бірін мейраммен құттықтап, ақжарма тілектерін жеткізді. Департамент ауласында тоқшылық пен молшылықтың басы болсын деп, жеті түрлі тағамды бір қазанда қайнатып, «Наурызкөже» пісірілді. Шарапаты мол шараға ардагерлер қауымы да шақырылып, оларға құрмет көрсетілді. Ақ дастарқан жайылып, дәмі тіл үйіретін ұлттық тағамдар қойылды. Ардагерлер қауымы да тарихы тереңнен бастау алатын бұл мереке жайында білгендерімен бөлісіп, «Ұлыс оң болсын, ақ мол болсын» деп бата жасады. Мерекеге орай бірқатар қызметкерлер марапатталды. Күн мен түн теңесіп, жер-жаһан нұрға бөленетін, халықты ортақ қуанышқа біріктірген тамаша мереке осылайша ерекше көңіл-күймен аталып өтті.
