Кездесуде Нұрсұлтан Назарбаев митрополит Александрдың Қазақстандағы қызметіне жоғары баға беріп, дін саласындағы мемлекеттік саясат мәселелеріне тоқталды – Сіздің Қазақстанда атқарып жатқан қызметіңізді жоғары бағалаймыз. Сіз бейбітшілік пен конфессияаралық келісім саясатын жүргізіп отырсыз. Біздің еліміз – зайырлы мемлекет. Барлық діни конфессиялардың теңдігі мен дін ұстану бостандығы Конституцияда және өзге де заңдарда бекітілген. Біз діни қызмет туралы заңнамаға өзгерістер енгізу жөнінде бастама жасадық. Сіз оған белсенді түрде атсалыстыңыз. Атқарған жұмысыңыз үшін Сізге ризашылық білдіреміз, – деді Қазақстан Президенті. Сондай-ақ, Мемлекет басшысы Астана және Қазақстан митрополитін өткен Рождество мерекесімен құттықтады. Митрополит Александр Нұрсұлтан Назарбаевқа қабылдағаны үшін алғыс айтып, Қазақстан Президентінің «Болашаққа бағдар: рухани жаңғыру» атты мақаласының рухани-адамгершілік тәрбие беру ісіндегі маңыздылығын атап өтті. – Тұлғаны рухани-адамгершілік тұрғыдан тәрбиелеу жөніндегі Сіздің стратегияңыз Қазақстанды одан әрі дамытудың негіз қалаушы құжаты болып саналады. «Болашаққа бағдар: рухани жаңғыру» атты мақала қоғамымыздың әрі қарай өркендеуіне қажетті дүниелерге жол ашады, – деді Астана және Қазақстан митрополиті.