Тәуелсіздік алған сәт. Осы тұста Елбасының алдында екі Жарлықтың жобасы жатқан көрінеді. Ең алдымен Қызылорда облысын тарату болса, екін­шісі Арал ауданы тұрғындарын бас­қа аймаққа көшіру туралы-мыс. Әлгі шешім қабылданса, онда тұтас қазақияның рухани құлдырауы хақ. Себебі, біздің өңір тарихтың алтын діңгегі іспеттес. Талай дүлдүлдің табаны осы жерге тиіп, Қорқыттың қобызының күйі әлі де сарнап тұрғандай. Ал, егер оны жоғалтсақ, келер ұрпақтың жайы не болмақ? Тарихыңды жоғалтудан асқан бақытсыздық жоқ шығар-ау, сірә?! Алайда, ол құжат Президенттің алдынан кері қайтты. Содан кейін, Қызылордада жаңа серпіліс басталды.
Бала күнімізде ауылдан қалаға қы­дырып келсек Қызылорданың орталық саябағына ғана бой тірейтінбіз. Ал, қазір ше? Ауылдан кірген автобус, дария жағалауымен жүйіткіп кіреді. Терезесінен қарасаңыз көз ала алмайсыз. Сарқырап аққан Сырдария талай сырды ішіне бүгіп, үнсіз ағып жатыр. Иінағаштай иілген көпірдің арғы жағына зер салсаңыз құрылыс алаңына ұшырасасыз. Құдды бір шетелде жү­ргендейсіз. Құмырсқадай тырбыңдап тынымсыз жұмыс істеген жұмысшылар, тұмсығын көкке тіреген крандар. Әйтеуір қайнап жатқан тіршілік. Мұндағы «Рухани жаңғыру» орталығының құрылысы да тәмамдалыпты. Сәулетінің өзіндік тарихиы бар. Бұл кешен бұрынғы Қазақ орталық атқару комитеті ғимаратының негізінде салынған екен. Қысқасы, Қызылорданың қай бұрышына келсеңіз де, еңсеңізді тік көтеріп қайтасыз.
Бас ауруға айналған баспана мәселесі де оң шешімін табуда. Соңғы жылдары қалада жаңадан бірнеше шағын аудан бой көтеріп, 7 мыңнан астам қызылордалықтар баспаналы болды. Сондай-ақ, 1 630 пәтерлік 36 көпқабатты тұрғын үйдің құрылысы бой көтеруде. Бас жоспарға сәйкес, жеке тұрғын үй құрылысы мәселесін шешу бағытында қажетті шара қабылданып, тиісті жұмыстар кезең-кезеңімен жүзеге асырылмақ. Атап айтқанда, қала аумағының көлемі бұған дейін 11 мың гектарды құраса, бас жоспарға сәйкес бұл жер көлемі 20 582 гектарға ұлғайтылды.
Елбасының «Төртінші өнеркәсіптік революция жағдайындағы дамудың жаңа мүмкіндіктері» атты Жолдауында «Ақылды қала» жобасы ұсынылған болатын. Ауқымды жобаны жүзеге асырып, қала халқының тұрмыс сапасын жасқартуда – Алаштың анасы атанған – Қызылорда қаласында да нақты шаралар қабылдануда. Мәселен, тұрғындар мен қала қонақтары әкімдікпен тікілей байланысуы үшін, мәселені дер кезінде шешуге арналған «Q Orda» мобильді қосымшасын жақын күндері іске қосады. Бұл қосымша арнайы Android пен IOS платформасына жасалып, екі тілде барлық ұялы телефонға жүктеледі. Сондай-ақ, «Е-ДДО» тұғырнамасы базасында «Data Evolution» ақпараттық жүйесімен «Балаларды бала­бақшаға автоматты түрде бөлу жүйесі» жобасы қолға алынды.
Атамекеннің әрбір тауы мен тасы, қаласы мен даласы, шүйгіні мен орманы асылдың сынығындай. Жердегі жатқан қайсыбір тасын төңкере қалсаң, тарихтың өткеніне сыр шертетіндей. Күн санап көркейіп, жыл санап жаңарған қассиетті мекеннің дамыған қалалармен иін тіресіп тұратын сәті де алыс емес. Қазақылықтың қайнары, Сыр елінің әкімшілік және рухани орталығы саналатын Қызылорда қаласы – небір тарихи кезеңдердің куәсі, тарлан тұлғаларды түлеткен, талай бастамалар мен тың жаңалықтардың қасиетті ордасы.
Бүгінде еліміздің тұңғыш астанасы Қызылордаға – 200 жыл толуда. Тарихи тағылымы терең бұл датаны атап өтудің маңызы да зор. Өйткені, бұл – тарихқа тағзым, болашаққа бағдар. Осы мақсатта, аймақ басшысының бастамасымен қала тұрғындары үшін тарихи маңызға ие болған мерейтойды атап өтуге ауқымды жұмыстар жүрігізілуде. А.Тоқмағанбетов атындағы қалалық мәдениет үйінде аудан әкімдіктерінің Қызылорда қаласы­ның 200 жылдық мерейтойына арналған мәдени шаралары өтеді. Айта кететін жайт, осы шара барысында әрбір аудан тұрмысы төмен 1000-нан аса отбасыға арналған қайырымдылық акциясын өт­кізеді.
Сондай-ақ, мәдени-бұқаралық іс-ша­ра «Абай дана, Абай дара қазақта» тақырыбымен облыстық әдеби жыр марофонын ұйымдастырып, оған өңіріміздің танымал жыршылары қатысады.