БАЛА БОЛАШАҒЫ БАСТЫ НАЗАРДА

«Бірыңғай республикалық ата-аналар конференциясының» дәстүрлі ата-аналар жиналысынан ерекшелігі, бұл жас ұрпақты инновациялық біліммен және отбасылық тәрбиелеу әдістерімен оқытуға бағытталған. Әрі түрлі тақырыптарды қамтитын жаңа формат. Осыған орай Т.Көмекбаев атындағы №250 мектеп-лицейінде «ХХІ ғасырдағы қазақстандық ата-ана: өз балаңа үлгі бол» атты жалпы республикалық ата-аналар жиналысы өтті. Жиналыс барысында мағыналы бейнероликтер мен слайдтар көрсетіліп, ақпараттар берілді. Жиынның мақсаты – ата-аналарға педагогикалық-психологиялық көмек көрсету, балалардың ақпараттық қауіпсіздігін қалыптастыру, интернет тəуелдігінің алдын алу, бала тəрбиесі үшін отбасы берекесінің маңыздылығын түсіндіру. Жиналыста мектеп психологтары ата-аналардан сауалнама алып, түсіндірме жұмысын жүргізді.

Аталған оқу ордасының басшысы Гүлзира Мұратбекқызы бұл шараның негізгі мақсаты – мектеп әкімшілігі, мұғалімдер және ата-аналар қауымдастығының арасындағы бірлік, осы бірліктің арқасында мектепке жаңадан қадам басқан оқушыларға педагогикалық, психологиялық кеңес беру екенін жеткізді. Сондай-ақ, конференция барысында «Балалардың ақпараттық қауіпсіздігін қамтамасыз ету: балаларды интернет арқылы түсетін жағымсыз ақпараттан қалай қорғау қажет», «Балаларда интернет-тәуелділік қалыптасуының алдын алу», «Мектеп ортасына деструктивті діни ағымдар енгізудің алдын алу», «Отбасылық құндылықтарды нығайту», «Балаға мектепке оқуға бейім­делуге тиімді көмек шаралары туралы», «Нейро-психофизиологтердің болашақ бірінші сынып оқушылары – ұлдар мен қыздардың ата-аналарына арналған ұстанымдары», «Баланың өзін-өзі бағалауын арттыруға ықпал етіңіз» сияқты маңызды тақырыптар маңайында мамандардың пікірі айтылды. Сонымен қатар, бала тəрбиесіне байланысты құнды пікірлер мен тұшымды ойлар білдірілді.