Шетелден әкелінетін көліктерге жаңа талап қойылады
Қазақстанда жеке тұлғалардың шетелден өз қажеті үшін әкелетін көліктеріне жаңа талап енгізіледі. Енді елге кіргізілетін көліктер шығарылғанына бес жылдан аспаған және экологиялық класы Euro-5 стандартына сай болуы керек, деп хабарлайды Egemen.kz.
Жаңа талаптарды Көлік министрлігі енгізіп отыр. Өзгерістер жеңіл автокөліктерге, мотоциклдер мен мопедтерге, 12 адамға дейін тасымалдайтын көліктерге, сондай-ақ жүк көтергіштігі 5 тоннаға дейінгі кейбір жүк машиналарына қатысты болмақ. Сондай-ақ ереже квадроциклдерге, қарда жүретін көліктерге және жолсыз жерлерде жүруге арналған өзге де мотокөлік құралдарына да қолданылады.
Көлік министрінің міндетін атқарушының тиісті бұйрығы 2026 жылғы желтоқсан айының соңында күшіне енеді.
