ЕЛБАСЫ ДЕНИСТІҢ АТА-АНАСЫНА ҚОҢЫРАУ ШАЛДЫ
Мемлекет басшысы Нұрсұлтан Назарбаев Денис Теннің ата-анасына жеке көңіл айтып, жанға сүйеу, көңілге демеу сөздерін өзі жеткізді. Бұл туралы «Қазақпарат» ақпарат агенттігіне берген сұхбатында Президенттің баспасөз хатшысы Айдос Үкібай хабарлады.
Оның айтуынша, Тәуелсіздіктің түлегі саналған даңқты спортшының қазасы Елбасының да қабырғасына батты. Ұршықтай үйіріліп, 2014 жылғы қысқы Олимпиадада қола жүлдесімен бүкіл Қазақстанды 25-орынға көтерген Ұлы дала ұланының қыршыннан қиылуы қазақстандықтардың қабырғасын қайыстырған болатын.
«Елбасы қайғылы жағдайда Денис Теннің мерт болғаны туралы хабарды терең қайғыра отырып, үлкен өкінішпен қабылдады. Денис Тен жас кетті, ол дарынды еді, тамаша тұлға болатын. Оны әлемнің көптеген елінде, әсіресе, Отаны Қазақстанда жұртшылық құрметтеді және сүйді. Мемлекет басшысы қысқа, бірақ жарқын өмірінде отандық мәнерлеп сырғанау спортының қалыптасуы және тұтастай алғанда, қазақстандық спорттың өркендеуі үшін көп еңбек сіңірген спортшының туыс-туғандарына шұғыл түрде көңіл айту жеделхатын жолдады. Сонымен бірге, Нұрсұлтан Назарбаев телефон шалып, Денис Тендей біздің жастарға лайықты үлгі болар өнегелі өренді, нағыз патриотты тәрбиелеген оның ата-анасына шын жүректен шыққан демеу сөздерін білдіріп, жеке көңіл айтты. Елбасы Денистің мезгілсіз өмірден өтуі оның туған-туыстары үшін де, сондай-ақ бүкіл ел үшін де орны толмас қайғы екенін айтты. Фигуристтің ата-анасына қолдау және көңіл айту сөздерін жеткізген Қазақстан Президенті оларды осы қылмыстың жасалуына айыптылар жауапкершілікке тартылатынына сендірді» деді А.Үкібай.
