ҚАСИЕТТІ ҚАДІР ТҮНІ ӨТТІ

Қасиетті Рамазан айының ең қадірлі сәттерінің бірі – Қадір түні Қармақшы аудандық «Қармақшы ата» мешітінде ерекше рухани жағдайда аталып өтті.

Кеш барысында жамағатқа Қадір түнінің артықшылығы мен сауабы туралы тағылымды уағыз-насихат айтылып, бұл түннің мұсылман өміріндегі маңызы кеңінен түсіндірілді.

Сондай-ақ жамағат арасында діни танымдық Kahoot интеллектуалдық ойыны ұйымдастырылып, қатысушыларға арнайы жүлделер мен сыйлықтар табысталды. Бұл игі шара мешіт жамағатының діни білімін арттырып, рухани кештің көркін аша түсті.

Бағдарлама барысында жамағатпен бірге тәһәжжуд намазы оқылып, мешітке келген қауымға еркін түрде құлшылық жасап, дұға-тілек етуге мүмкіндік берілді.

Кеш соңында мешітіміздің қари бауырына жамағат атынан құрмет көрсетіліп, ақсақалдар ақ батасын берді. Жамағат ризашылықтарын білдіріп, дәстүр бойынша шапан жауып, алғыс айтты.

Алла Тағала қасиетті Қадір түнінде жасалған барлық құлшылықтарымызды қабыл етіп, берекесін нәсіп етсін!