СЫБАЙЛАС ЖЕМҚОРЛЫҚҚА ҚАРСЫ АШЫҚ ЖӘНЕ ЖАУАПТЫ МЕМЛЕКЕТТІК БАСҚАРУ

Ең маңызды міндеттердің бірі – халықтың сенімін ақтайтын, ашық әрі әділ қалыптасқан мемлекеттік басқару жүйесінде сыбайлас жемқорлыққа қарсы күресті күшейту және оның алдын алу бағытындағы жүйелі жұмысты тұрақты түрде жетілдіру.

Сыбайлас жемқорлық – мемлекеттің дамуына, қоғамның әділдігіне және азаматтардың құқықтарының қорғалуына тікелей зиян келтіретін құбылыс. Сондықтан бұл мәселеге селқос қарау – болашаққа немқұрайлы қарау деген сөз. Ел Президенті атап өткендей, бүгінгі таңда әрбір мемлекеттік қызметші өзінің кәсіби міндетін атқаруда адалдықты, ашықтықты және жауапкершілікті басты қағида ретінде ұстануы тиіс.

Мәслихаттың барлық шешімдері мен нормативтік актілері, жоспарланған отырыстар, депутаттардың қабылдау кестелері және басқа да маңызды ақпараттар жұртшылық үшін толық қолжетімді болуы тиіс. Бұл – тұрғындардың билік жұмысына деген сенімін арттырумен қатар, шешім қабылдау үдерісіне қоғам өкілдерін кеңінен тартуға мүмкіндік береді.

Сонымен қатар, мемлекеттік сатып алуларды ашық форматта өткізу, көрсетілетін мемлекеттік қызметтердің сапасын арттыру және оларды цифрландыру да жемқорлық тәуекелдерін айтарлықтай төмендетеді.

Бүгінде біздің аппаратта сыбайлас жемқорлық тәуекелдерін төмендету бағытында бірқатар маңызды шаралар жүзеге асырылуда:

1. Қызмет көрсету процестерін цифрландыру – Бұл адами факторды азайтып, шешім қабылдаудың ашықтығын арттырады.

2. Аудандық мәслихат аппараты қызметкерлері арасында – әрбір қызметкердің қызметтік әдеп нормаларын меңгеруі және қатаң ұстануы қамтамасыз етілген.

3. Қоғаммен тұрақты байланыс: – Шешімдердің жариялылығы, тұрғындардың ұсыныстарын уақытылы қарау – ашық жұмыстың негізгі көрсеткіші.

4. Алдын алу шаралары: – қызметкерлер арасында сыбайлас жемқорлыққа қарсы түсіндіру жұмыстары тұрақты жүргізіліп, құқықтық сауаттылық артуда.

Мемлекеттік органдардың ашық қызмет етуі – қоғамның сенімін арттырудың басты шарты. Сондықтан мәслихат аппараты азаматтармен ашық диалог жүргізуге, олардың пікірін ескеруге және халықтың бақылау тетіктерін күшейтуге ерекше мән береді.

Біздің ортақ міндет – сыбайлас жемқорлыққа жол бермейтін, әділдік пен заң үстемдігіне негізделген мемлекет құру. Бұл тек мемлекеттік қызметшілердің ғана емес, әрбір азаматтың жауапкершілігі.

Сыбайлас жемқорлыққа қарсы күрес – бір реттік науқан емес, ұдайы назарды талап ететін ұзақ мерзімді процесс. Біз өз қызметімізде ашықтық пен адалдық құндылықтарын басшылыққа ала отырып, ел сенімін ақтауға бағытталған жұмыстарды жалғастыра береміз.

Еліміздің дамуы, қоғамның тұрақтылығы және халықтың әлауқаты – біздің ортақ мақсатымыз. Бұл мақсатқа тек әділдік пен адалдық жолымен ғана жете аламыз.