МЕМЛЕКЕТТІК ТІЛ – КӨРНЕКІ АҚПАРАТТА
Жақында аудандық мәдениет және тілдерді дамыту бөлімінің ұйымдастыруымен кент әкімшілігі, Халықаралық «Қазақ тілі» қоғамы қоғамдық бірлестігінің аудандық филиалы және аудандық кәсіпкерлік және өнеркәсіп бөлімімен бірлесіп, Жосалы кентіндегі көрнекі ақпараттар мен жарнамаларға қатысты түсіндірме іс-шарасы өтті.
Шара аясында Жосалы кентінің орталық көшелерінде орналасқан 14 кәсіпкерлік нысан, шағын және орта бизнес субъектілері қамтылды. Мониторингтік топ нысандарды аралау барысында жарнама мен көрнекі ақпараттардың Қазақстан Республикасындағы «Тіл туралы» Заңы талаптарына сәйкестігін тексерді.
Тексеру барысында бірқатар кемшіліктер анықталды. Атап айтқанда, кейбір нысандарда қазақ тіліндегі жазулардың болмауы, шетел тілінің басым қолданылуы және орфографиялық қателерге жол берілуі секілді олқылықтар кездескен. Сауда нысандарының иелеріне түсіндірме жұмыстары жүргізіліп, заң талаптарына сай көрнекі ақпарат пен жарнама өнімдерін мемлекеттік тілде дұрыс рәсімдеу қажеттігі ескертілді.
Мұндай іс-шаралар алдағы уақытта да жалғасын тауып, мемлекеттік тілдің қолданылу аясын кеңейтуге, сонымен қатар тіл мәдениетін арттыруға бағытталады.
«Қт» ақпарат
