"Кедергісіз келешек": инклюзивті білім беруді дамыту партия назарында

Бүгін “AMANAT” партиясының "Кедергісіз келешек" партиялық жобасы аясында Байқоңыр қаласындағы №272 орта мектептегі ерекше білім беруді қажет ететін оқушыларға арналған арнайы инклюзивті кабинеттің жұмысымен танысу мақсатында партияның Байқоңыр филиалының Атқарушы хатшысы Мақсат Есбенбетов, партия филиалы жанындағы партиялық бақылау комиссиясының төрағасы Сейл Жұмадьяров және комиссия мүшелері партиялық мониторинг жүргізді.

Арнайы кабинеттің мақсаты: ерекше білім беруді қажет ететін балаларға жүйелі педагогикалық, әлеуметтік-психологиялық көмек көрсету. Сондай-ақ, кабинетте баланың эмоционалды, әлеуметтік, интелектуалды мүмкіндіктерін дамыту, жеке басының қасиеттерін қалыптастыруға жұмыс жасалады.

"Бұл кабинетте балаға түзету-педагогикалық көмек пен жеке дамыту қызметі көрсетіледі. Оқушының танымдық қабілеттерін, сөйлеу ерекшелігін, назарын, еңбекке қабілеттілігін, даму динамикасын, білім деңгейін анықтау, оқу материалын меңгерудегі мүмкіндіктері мен ерекшеліктерін зерттеу, оқушының болашақ дамуын және түзету жұмыстарын таңдау үшін тиісті жұмыстар жүргізіледі", - деді мектеп директорының орынбасары Беріккүл Теңізбаева.

Зерделеу жұмыстары барысында мониторингтік топ кабинеттің әдістемелік құралдарымен танысып, мамандардың ұсыныс-пікірлерін тыңдады.

Алдағы уақытта мамандар тарапынан көтерілген мәселелер аудандық білім бөліміне жолданатын болады.