Қысты қамсыз өткізу – бүгінгі дайындықтан басталады
Жылу беру маусымы басталар алдында өрт қауіпсіздігі мәселесі ерекше маңызға ие болады. Суық күндерде тұрғындар жылу құрылғыларын жиі пайдаланып, пеш, электр жылыту құралдары мен газ жабдықтарына көбірек жүгінеді. Бұл өз кезегінде өрт шығу қаупін арттырады. Сондықтан әрбір азаматтың қауіпсіздік ережелерін сақтауы – жеке басының ғана емес, бүкіл қоғамның амандығы үшін аса маңызды.
Осы ретте аудандық Төтенше жағдайлар бөлімі, №10 және №8 өрт сөндіру бөлімдерінің қызметкерлері әр аптаның сәрсенбі, жұма, сенбі күндері тұрғын үйлерді аралап рейдтік түсіндірме жұмыстарын жүргізуде.
Мамандар әр үйге барып, арнайы жадынамалар мен парақшалар таратып, өрт туындаған жағдайда не істеу керектігін егжей-тегжейлі түсіндіреді. Әсіресе, көпбалалы отбасылар мен қарт адамдар тұратын үйлерге ерекше назар аударылуда.
– Біздің басты мақсатымыз – тұрғындардың қауіпсіздігін қамтамасыз ету. Өрт – алдын алуға болатын апат. Сондықтан әр азамат қауіпсіздік ережелерін сақтауға міндетті. Алда жылу беру маусымы жақындап келеді. Осы орайда үй пештерін, газ жүретін желілерді мұқият тексеріп, өрт қауіпсіздігінің алдын алуға шақырамын, – дейді аудандық Төтенше жағдайлар бөлімінің бастығы азаматтық қорғау полковнигі Сақтабаев Өмірбек Жаңабайұлы
Осындай түсіндіру жұмыстарының арқасында өрт жағдайларының алдын алып, тұрғындардың қауіпсіздігін қамтамасыз етуге мүмкіндік туады. Бұл бағыттағы жұмыстар жылу беру маусымы аяғына дейін жалғасатын болады.
Қайнар ДАЛДИЕВ
