Кесене айналасы көгалдандырылды
Сенбіде «Таза Қазақстан» республикалық экологиялық акциясы аясында «Киелі мекен» апталығы өтіп, ауданның барлық аумағында орналасқан тарихи ескерткіш пен саябақтарға, кесене мен қорымдарға санитарлық тазалық, көркейту-көгалдандыру жұмыстары жүргізілді.
Мемлекет басшысының тапсырмасымен бастау алған игі іс-шараға аудан әкімі Жандос Еркінбек қатысып, арда- герлермен бірге үш жүзге пір болған Марал ишан кесенесінің аумағына тал отырғызды. Алдымен баба рухына Құран бағышталып, одан кейін көркейту-көгалдандыру бойынша ағаш көшеттері егілді. Былтыр демеушілік есебінен осында су ұңғымасы қазылып, аяқсу мәселесі толық шешімін тапқан-ды. Енді жасыл желекті суғаруда еш кедергі жоқ. Сенбілікте қорымның айналасы күл-қоқыстан тазартылып, көркем кейіпке енді.
Шара барысында аудан басшысы әр елді мекеннің тазалығы, сәулетті көркі тұрғындардың жанашырлығына байланысты екенін айта келе, жиналған жұртшылықты Мемлекет басшысының бастамасын бірауыздан қолдауға, туған жерді бірге көркейтуге шақырды.
Қоғамда экологиялық мәдениетті қалыптастыруға бағытталған акция ауданның барлық елді мекендерінде жалғасын тауып, мекеме, кәсіпорын қызметкерлері мен еріктілер тазалық жұмыстарына өз үлестерін қосты.
«ҚТ» ақпарат
