Қаза тапқан кеншілер отбасына көрсетілетін көмек

Қарағанды облысының әкімдігі уәкілетті мемлекеттік органдармен бірлесіп, Костенко атындағы шахтада болған өрт салдарынан қаза тапқан «АрселорМиттал Теміртау» АҚ жұмысшыларының отбасы мү­шелерінің тізімін жасап жатыр. Мемлекет басшысының тапсырмасы бойынша оларға то­лық­қанды көмек көрсетілетін болады.
Атап айтқанда, келесі қолдау шаралары қарасты­рылған:
– компания қаражаты есебінен отбасыларға баспана сатып алу;
– моральдық зиян үшін 10 жылдық жалақы мөлшерінде бір­жолғы төлем;
– асырауында болған балаларға 18 жасқа толғанға дейін ай сайынғы сақтандыру төлемі (ЖОО студенті болса, 23 жасқа дейін);
– Мемлекеттік әлеуметтік сақ­тандыру қорынан жала­қысына байланысты ай сайынғы төлем;
– қамқорлықтағы адамдардың санына байланысты асыраушысынан айырылу жағдайы бо­йынша ай сайынғы мемлекеттік жәр­дем­ақы;
– жұмыс берушінің қаражаты есебінен отбасылардың несиелерін өтеу;
– жерлеуге байланысты барлық шығындарды өтеу;
– қаза тапқандардың балалары мен жұбайларын жұмысқа орналас­тыру;
– 23 жасқа дейінгі балалардың оқу ақысын төлеу;
– қаза тапқандардың жұбайлары мен балаларына санаторий-курорт­тық емделуге жолдамалар беру;
–  үйді пешпен жылытатын отба­сыларына жыл сайын көмір бөлу.
Мемлекет басшысының тапсырмасына сәйкес «АрселорМиттал Теміртау» АҚ-ның қаза тапқан қыз­мет­кер­лерінің отбасыларына бар­лық қажетті көмек көрсету мәселелері ел Үкіметінің ерекше бақылауында болады.