Тәртіпті болуға үндеді
qarmaqshy-tany.kz Жақында Байқоңыр қаласындағы №277 мектеп-лицейінде шаһардағы қазақ мектептерінің 8-11 сыныптарында білім алатын ер балалардың қатысуымен жасөспірімдер арасындағы топтық төбелестің, құқықбұзушылықтың алдын алу және болдырмау мақсатында сала маман дарымен бірлесе отырып, профилактикалық түсіндірме жиыны өтті.
Жиында аудан бойынша білім бөлімінің Байқоңыр қаласындағы білімді дамыту секторының меңгерушісі Жадыра Алданова, Қазақстан Республикасы Ішкі істер министрлігінің Байқоңыр қаласындағы өкілдігі бастығының орынбасары, полиция подполковнигі Сейілбек Әлиев хабарлама жасады. Сондай-ақ, «Байқоңыр» кешеніндегі Ресей Федерациясының Ішкі істер министрлігінің жасөспірімдер істері жөніндегі бөлім инспекторы, полиция майоры Ландора Кунспаева, сонымен бірге Қазақстан Республикасы Ішкі істер министрлігінің Байқоңыр қаласындағы өкілдігінің әкімшілік полиция бөлімінің учаскелік полиция инспекторы, полиция капитаны Нұрлан Жақыпов қала көлемінде болып жатқан құқықбұзушылық ахуал жайлы баяндап, қазіргі ахуалға тоқталды. Топтық төбелестің зардабы, зақымданған баланың денсаулығы мен төбелесті ұйымдастырған әкімшілік жауапкершілікке тартылатындығы туралы сөз қозғады.
Хабарламашылар әсіресе, топтық төбелес, құқықбұзушылық әрекеттер арқылы жасөспірімдердің құқықтық есепке алынуы олардың болашақ өміріне, қалаған мамандығын меңгеруіне зиянын тигізетінін баса айтты.
Жиын барысында 11 сыныптың білім алушылары іс-шараға қатысушы қатар-құрбысына салауатты өмір салтын ұстануға, білім алуға, атаананы құрметтеуге шақырды. «Төбелесіп атаананы мұңайтқанша, қуантуға тырыс, төбелесіп көшбасшы болғанша, білім, адамгершілік жағынан көшбасшы бол, жас шағыңда ізденіп оқып, толық жағдай жасалынған заманда білім ал» деп үндеу тастады.
Жиын соңында мектеп оқушылары сала мамандарына көптен көкейлерінде жүрген сұрақтарын қойып, тұщымды жауаптарын алды.
Нұрбай ӘБІЛАХАТҰЛЫ
