Байқоңырда ғарышкерлер күні аталып өтті
qarmaqshy-tany.kz Жылдағы дәстүрмен 12 сәуір – Ғарышкерлер күні мерекесіне байланысты Байқоңыр қаласындағы орталық алаңда тұңғыш ғарышкер Юрий Гагарин ескерткіші алдынан бастау алған мерекені қала тұрғындары жоғары дәрежеде атап өтті.
Салтанатты шараға Қызылорда облысы әкімінің орынбасары, Қазақстан Республикасы Президентінің «Байқоңыр» кешеніндегі арнаулы өкілі, Байқоңыр қаласы әкімшілігінің басшысы, «Роскосмос» мемлекеттік корпорациясым«Байқоңыр» кешеніндегі филиалының басшысы, басқа да жергілікті мекеме басшылары мен өкілдері, қала тұрғындары қатысты.
Мерекелік шарада одан әрі қаланың зиялы қауымы, қала қонақтары, тұрғындармен бірге Юрий Гагариннің ескерткішіне гүл шоқтарын қою рәсімін жасап, митинг өткізді.
Митингке қатысушылар облыс әкімінің орынбасары, Қазақстан Республикасы Президентінің «Байқоңыр» кешеніндегі арнаулы өкілі Қайрат Нұртай, Байқоңыр қаласы әкімшілігінің басшысы Константин Бусыгин, «Роскосмос» мемлекеттік корпорациясы «Байқоңыр» кешеніндегі филиалының басшысы Игорь Дмитриевтің тақырып аясында сөйлеген сөзі мен құттықтауына назар аударып, КСРО ғалым-конструкторы, КСРО Ғылым академиясының академигі Сергей Королевтің ескерткішіне гүл шоқтарын қойып, тағзым етті.
Мерекелік шаралар аясында Байқоңыр қаласының білім беру мекемелерінің оқушылары арасында жеңілатлетикалық «Гагарин эстафетасы» ұйымдастырылды.
Сонымен қатар, шараға оған қатысушылар дүниежүзілік авиация және космонавтика күні, Юрий Гагариннің ғарышқа ұшуының 62 жылдығы және алғашқы әйел ғарышкер Валентина Терешкованың ғарышқа ұшуының 60 жылдығына байланысты қалалық «Сатурн» киноконцерт залында ғарышта түсірілген әлемдегі алғашқы «Вызов» атты көркем фильмінің тұсаукесерін тамашалады.
Мерекелік салтанатта Байқоңыр қаласы өнерпаздары ән мен биден шашу шашып, қала тұрғындарына мерекелік көңілкүй сыйлады.
Нұрбай ЖАНӘДІЛОВ
