qarmaqshy-tany.kz Мемлекет басшысы ҚасымЖомарт Тоқаев сегізінші сайланған Парламенттің бірінші сессиясында ел өміріндегі аса өзекті сегіз мәселені көтерді.

Ауыл шаруашылығымен айналысатын іргелі жеке құрылымның жетекшісі ретінде маған төртінші бағыт «Азықтүлік қауіпсіздігін қамтамасыз етуге баса мән беру қажет» дегені ерекше әсер етті.

Президент бұған дейінгі Жолдауларында, Үкіметтің ке­ңейтілген отырыстарында да аса іргелі саланы дамыту туралы айтып, Үкіметке нақты міндет жүктеп келді.

Сондай-ақ өз сөзінде «Ауыл тұрғындарына 5-7 жылға жылдық өсімі 2,5 пайыз болатын шағын несие берілетінін, ауыл шаруашылығы кооперативтері халыққа қызмет көрсету және өнім өткізу үшін құрылатынын жеткізді. Қазіргі таңда өзекті мәселеге айналған су қауіпсіздігі жайлы да айрықша атап өтті. Саладағы бағыт-бағдарды тағы бір айқындап берді.

Енді елді көгертеміз, ауылды ажарландыра түсеміз деген ат үстінде жүрген азаматтар мемлекеттен несие алып, ауыл шаруашылығын өркендетемін деген сарындағы бітпейтін қу сөзді қойып, ауылға шынайы қызмет етуге келіңіздер дегім келеді. Мұндай мүмкіндік жылда бола бермес.

Төрт түлік мал өсіремін, жер жыртып, егін саламын деген ағайындар келіңіздер. Сіздерге ақылымызды айтып, тәжірибемізбен бөлісейік. Ауылға біздің ісімізді жалғастыратын жастар керек-ақ. Ауылды көркейтіп, ел еңсесін биіктетін жастар, мына сіздер!