qarmaqshy-tany.kz «Халықты халықпен, адамды адаммен теңестіретін – білім» деп М.Әуезов атап көрсеткендей, егемен елдің келешегі кемел білім мен ұлағатты тәрбиеге байланысты.

Өскелең ұрпақты рухани-адамгершілік, эстетикалық тәрбиелеу, тұлғаның үйлесімді дамуы, өз ойын білдіру, әлемді эстетикалық және бейнелі тану факторы ретінде балалар мен жастардың театр шығармашылығын қолдау және дамыту, өзін-өзі таныту мақсатында «Театрдың ғажайып әлемі» тақырыбында театр өнерінің республикалық фестиваль-байқауы өтті. Аталған байқауда Т.Жүргенов атындағы No80 мектеп-гимназия оқушыларынан құралған театр ұжымы өнер көрсетіп, аудандық кезеңнен жүлделі І орынды, облыстық кезеңнен жүлделі ІІ орынды иеленді.

Оқу жылының басында мектеп, аудан абыройын еселеген мектеп мақтанышына айналған дарынды оқушыларымызды қалай мақтасақ та артықтық етпейді. Мектеп өмірінде болып жатқан түрлі шараға белсене қатысып, білім, өнер додаларында сан мәрте жеңіс тұғырынан көрініп жүрген дарынды шәкірттеріміздің еңбектері қашан да елеулі. Мұғалімдерінің ықыласы мен сүйіспеншілігіне бөленген оқушыларымыздың бойларындағы дарындық қасиет қанмен беріліп, өскен ортасында, яғни, мектеп қабырғасында шыңдалып, ұстаздарының қолдауымен жетіле түсті.

Жас өркеннің бойындағы табиғат берер ерекше қабілетті, дарындылықты тани білу, оның ары қарай дамуына бағыт-бағдар бере білу – ерекше қиын да қызықты іс. Алайда әр баланың жеке қабілетін анықтап, оны сол бағытта жетелеу – ұстаз парызы. Баланы заман талабына қарай көрегендікпен икемдеп, озық өнегені санасына сіңіре білу, оларды шығармашылық бағытта жан-жақты дамыту – бүгінгі күннің басты талабы. Осындай игі қасиеттерді бойға жиған, жетекшілік етіп жүрген сыныбына бар мейірімін төгіп, биіктерді бағындыруына себепші бола білген ағылшын тілі пәні мұғалімі Индира Ұзақбайқызы мен жұлдызды сыныптың алғашқы ұстазы Гүлзипа Сабырбайқызының бала бойындағы дарынды танып, жетілдіруде еткен еңбектері зор.

«Ұрпағы білімді халықтың болашағы бұлыңғыр болмайды» дегендей, 80 жылдан асқан тарихы бар, қасиетті қарашаңырақ No80 мектеп-гимназия қабырғасынан ұшқалы отырған аяулы шәкірттеріміздің арқасында мектебіміздің мерейі әлі талай артып, абыройы қашан да асқақ боларына сеніміміз мол.