Елдің атын ер шығарады
Неше күннен бері Қазақ елін дүркіретіп, еліміздің көк туын мұхит асып желбіреткен, Мексика мемлекетінде өткен жасөспірімдер арасында ауыр атлетикадан Әлем чемпионы болған жерлесіміз Сәулебеков Ерасыл Аянұлы мен оның бапкері Айдар Қойшыбекұлын және Ерасылдың ата-анасын Жосалы кентінің әкімі Шыңғыс Әбділәмитұлы қабылдады.
Қабылдауға қатысқан Жосалы кентінің ардагерлері мен ұжым қызметкерлері спортшыны зор қошеметпен қарсы алды.
Шыңғыс Әбділәмитұлы Ерасыл мен бапкерінің спорттағы жетістіктерін саралай келе Жосалы кенті әкімінің Алғыс хатымен марапаттап, бағалы сыйлық тарту етті.
Ал, намысты, қайратты ұл тәрбиелеп өсірген батырдың ата-анасына ерекше құрмет көрсетіп, қазақы дәстүрмен әкесіне шапан киізсе, анасына камзол, ақ жаулық жауып, ықылас гүлін ұсынды.
Спорт – елдің мерейін асырып, абыройын тасытатын сала. Осы салада мықты спортшыларымыз шыңдалып, Қазақстанды әлемге мойындататын чемпиондарымыз көп болсын!
Іс-шара соңы аудандық мәдениет үйі көркемөнерпаздарының құттықтау концертіне ұласты.
